Villaviciosa hermosa, Asturies patria querida

Ún de los munchos oxetivos que tenía la mio marcha d'Asturies esti pasáu Setiembre yera reconciliame cola mio tierra. Yera el menos urxente, pero paezme que y'el qu'algamé enantes que nengún.
Estes tres selmanes tras tornar a Asturies los sentimientos fueren amestaos. Estes nun fueren nin de lloñe les meyores Navidades, nin tampoco les más fáciles... nin siquier les más prestoses. Coses de la vida, planees unes vacaciones tranquilu cola familia y los collacios y la vida ponte de chófer ente Cabueñes y la Villa. Nin planeao.
Sicasí, con tós estos problemes sentime mil vegaes más agustu estes tres selmanes equí, en casina, que pa allá pa Castiella. Sobre tou comparao col últimu mes. ¿Por qué? Pol contautu con esta tierra. Nun ye por ser patriu nin presumíu, pero collacios, Asturies tien daqué.
Si quixi marchar yera porque llevaba yá dos años equí, ensin apenes dalgún viaxe por falta perres (y compañía), y taba empezando a fartar. Sabía que'n dalgún momentu sentiría morriña y señardá. Y equí toi, a puntu marchar otra vegada pa Zamora, y ensin nenguna gana moveme d'equí.
Va como una selmana o asina, tornando de Xixón, miré pal cartelu na autopista "Villaviciosa 3 kms". Entamé a pensar en cuantes vegaes tenía vistu esi lletreru dende que vivo. Entamé a pensar en otro llugares onde tenía vivido o pasado: Canterbury, Reus, Brighton... Llugares dende onde torné siempre pasando por esa mesma autopiesta, lleendo esi mesmu cartelu, y llugares pa onde examás torné nenguna otra vegada tras dexales. Quiciabes, como va pasame con Zamora. Tamién alcordeme de lleer esi cartelu tornando de llugares non tan lloñe, como Uvieu, Xixón, Colunga, tornando de trabayar, d'actuar, o de marcha. Y el resultáu de toes y cada una de les vegaes que lleí esi cartelu, pa mi significaba lo mesmo: "A casa 3 kms". Esi y'el significáu que Villaviciosa va tener pa mi siempre: "casa". Ensin importar los viaxes que faga pol mundiu nin los años que vayan pasar.

Caminar pola plaza'l güevu, mirar el sombreru con mazanes del parque, pasar pol Teatru Riera y pensar arguyosu  "ehí actué dos vegaes", pasiar pola Barquerina, onde tantos vídeos grabé, echar una pachanguca de baloncesto nel poli. Ver que les coses cambien y que, d'igual forma, nada cambió. Falar colos amigos. Falar n'asturianu, anque sea amestáu, soltar un "ye" o un "santinos" ensin que te miren raro, beber sidra a preciu normal ensin tener qu'esplicar que s'escancia, que ye un vaso pa tou el grupu, y que nun se bebe a sorbinos, cagame'n ros (¿el de Friends?) y nes pites de Grau... Esi sentimientu de que somos pocos pero especiales. Asturies tien un daqué. Un sentimientu de comunidá que, polo que pudi ver, nun ye tan común como yo creyía.
Marcho otra vegada, pero sé que siempre va tar equí la mio casa. Que siempre voi saber el camín pa llegar a Uvieu, el camín pa dir a Xixón, siempre podré dir a ParquePrin a cenar o a un cine... y sobretou, siempre voi saber, dende cualesquier llugar del mundiu, el camín pa llegar a Villaviciosa. Porque pasen los años pasen, pasen les coses que me pases, y faga los viaxes que faga: tanto Asturies como Villaviciosa van ser siempre el mio llar.
Marcho otra vegada y voi echate de menos asgaya, pero nun tengo la más minima dulda de que vamos volvenos a ver. Puxa Asturies. Puxa la Villa.